Officina

Tute ‘r matin, ant r’ofissin-a sot ra lea

I ruva Giaco a 8 e mesa o giù da lì

o r’é an pension dòp 40 agn passà an feriera

E da 10 agn o r’é lì tranquil, travaja pì

Dòp esse andà al bar Italia a pijé ‘r cafè

o giornal ro lesa nen, a-j na frega gnente

Ra giornà a vena longa da fé passé

Alora os fica ant r’ofissin-a da Clemente

o r’é lì, bamblon-a e o bèica cos’o fà

Dòp avèj parlà dër vent e dra pieuva

O r’é bon ëd vireje apress tuta ra giornà

o dà fin-a dij consij, o almeno o-i preuva

Clemente o travaja e o fà nen cas

Për chiel Giaco o fà part dr’aredament

Mach a des ore quand o-j pòrta colassion

Pausa an ufissi, alora lì o-j dà ‘n pò da ment

Quand o-i ruva quaicun, pòrto ra machina

Giaco o s’avsin-a e o taca sùbit boton

o-j fà già na diagnosi anticipà

Prima che Clemente o pija an man ra situassion

Ultimament ansema a chiel os fërma Maio

Da 20 agn pensionà dra ferovìa

Tuti e doi ansema o fan na fèra

E os na stan lì mesa giurnà, van pì nen via

I-é ‘dcò Tinin, ma chiel os fërma pòch

O io nen pasiensa, sempre en po’ afanò

Ma se për cas o-i ruva giù anche Balòch

Fan un casin, pèj dër giòbia quand o-i é ‘r mercà

Parloma nen quand o ruva Stevo Sùbia

Un ch’o va an vir a monté ij bal a palchèt

O j’ha na vos ch’ot përfora r’orìa

un pò badago, a parlene con rispèt

Peu i-é Renato, ër frèl ëd Barilon

Onorato, Sergio, Rico, Bagassa

I-é dër matin ch’o-i é pì gent ant r’ofissin-a

Ëd coj ch’ot podrìe trové an Carù an mes a ra piassa

Clemente dër vòte o disa: “cheich di!”

I saro tut e deurb un centro anziani!

Bèica che ròba? J’heu-lo adotave mi?

Sarà il mio nuovo lavoro del domani!

Un mes soris, ma con un pò ‘d vërgògna

os na rendo cont che o rompo anche ‘r bale

E alora cito, o s’ancamin-o doi për vòta

E van a fé quat pass lì sòta il viale

Ma ra matin dòp, come se gnente o fùssa

o ruva Giaco a 8 e mesa o giù da lì

Prima ‘d parlé o rangoja e o tossa « Clemente? ot na falo gnente s’i ston un pò belessì?

Lascia un commento

Il tuo indirizzo email non sarà pubblicato.