Na ca con ij pogieuj

Na ca con ij pogeuj, la cort ëd pera

masnà con ël sol ant j’euj e la portiera ch’a rusa s’a fan un pò ‘d rabel,

a crìa, ma peui a l’é dossa come l’amel

Na ca con ij pogeuj, linseuj tendù

chiel a subia da ‘nt la cort, chila a ven giù

për desse doi basin sota ‘l porton

duminica ‘s vëddoma ‘n procission.

A son passà tanti ani …

mi i j’era na masnà

ma ògni tant i penso a cola ca …

Na ca con ij pogieuj, che ‘d personagi

ch’a son passame ‘nt j’euj e coj paragi …

la sèira d’istà a smijava d’esse ‘nt un pais

ant la stra as pijava ‘l fresch  ansema a j’amis

E jer mi i son passà da lì davanti

davanti a col porton im vorìa fërmé

ma adess an cola stra a-i é ‘n traffich ëd l’assident

e ‘n civich a la fame segn ëd sircolé

Ciao ca, i l’hai dije, ‘l mond am ciama, i deuvo ‘ndé

arvëdd-se quaich vòlta ‘nt ij mè pensé

Lascia un commento

Il tuo indirizzo email non sarà pubblicato.