Për che rason ël Pò a l’é anrabiasse
a l’ha ampinì soe val con ëd l’aqua àuta
dësbland ij pont, le stra, le ca, le piasse
quatand sità e campagne con soa pàuta?
La rason a l’é che ‘l Pò
a l’ha vist rivé coj ëd la Lega
che an man a tnisìo dle ampole
për porteje via l’aqua al Pian dël Re
e a l’ha tacà a crié: “Chi a son ste ciole
Che, tute vestìe ‘d verd,
con l’armadura a gieugo ai babacio,
sensa fé na piega?
Esse balengo sì, ma con misura,
picio va bin, ma nen com’ coj ëd la Lega!
Coj òmo verd a son ëvnù sota ‘l Monvis
con an testa na fissa, coma un ciò:
cola ‘d pijesse mia aqua a la sorgiss
për fé la sirimonia dël dio Pò.
Prèive ‘d na veja religion pagan-a
son tramudasse ‘d colp tuti an crosià;
fin la Cesa Catòlica Roman-a për lor
a l’é vendusse ai fieuj d’Allah!
Adess për lor combate l’Alcoran,
a l’é na fissassion, a l’é na smania:
contra moschee, Maomètt e maometan
a son cissà coj gadan ëd la Gadania.
Mi, parland come Pò, bin pì ‘d na vòta
j’heu vist gent d’ògni sòrta,
an sle mie arvère: imperador, tirann e patriòta,
prinsi, baron, soldà ‘d tute bandiere.
Tuti a vnisìò con ëspà, fusij e lansa
për pianté arlongh mie sponde ‘l sò drapò,
d’Austria, d’Italia, Almagna, Spagna e Fransa
co ‘l but -për drit divin- ëd pijesse ël Pò.
Ma, Cristo, a j’ero ‘d gent ch’a l’avìa ij cojon
quàich vòlta ‘d lasaron, ma sempe svicio:
Visconti, Este, Gonzaga, Napolion…
sensa confront con costa banda ‘d picio!”.
L’é për lòn, brava gent, ch’a l’é nen vera che ‘l Pò
A l’abia anlagà la soa pianura
për question riguardant tuta la tèra
ch’a l’é bele antossià, l’é pì nen pura,
përchè a-i é tròp dë mnis ant l’aqua e ‘nt l’aria,
e ij montagnin a abandon-o le soe baite,
fium e torent a son mach na dëscaria
e j’euvre ‘d protession a son malfàite.
Se tanta pòvra gent a l’é trovasse
quatà d’aqua e ‘d paciòch
soa ca e botega,
la rason l’é che ‘l Pò a l’é anrabiasse mach për colpa ‘d coj picio frust ëd la Lega.