Mi ‘m na stasìa da part, stërmà come na mumia
e gnun a savìa se mi i j’era òm ò sumia,
la glòria am fasìa mai bogieme dal mè pòst
e ‘l làur am servìa mach për fé cheuse l’aròst.
La gènt ëd cognission a l’ha fame comprende
che mi, vers l’òm ëd la stra i j’avìa ‘d cont a rende
e che, për nen casché ant ël scur ël pì complet,
a ventava ch’i butèissa ‘n piassa ij mè segret.
Trombëtte dla celebrità,
voi i seve bin mal ambocà.
Për fé ‘d publicità a l’han dime ch’a bzògna
che mi, sensa rossor e sensa pì vërgògna
i conta ansema a chi e an che posission
im faso mie crinade, cand n’hai l’ocasion.
S’i publichèissa ëd nòm a-i sarìa fòrse tròpe
madame e madamin ch’a passërio për ëd salòpe,
a-i sarìa tròpi amis ch’am varderìo bin mal
e ‘d colp ëd rivortela im na pijërìa ‘n quintal.
Trombëtte dla celebrità,
voi i seve bin mal ambocà.
I son sempe stàit contrari a mostré an gir, për via,
mie ròbe – come as dis – ch’a servo a fé famija;
im ancalo pròpi mai a mostré ij mè valor
a dj’àutri ch’a sio nen mie fomne e ij mè dotor.
I dovrìa magara, për rason publicitaria,
sté a sopaté ij tamborn con le mie ròbe an aria,
dovrìa tënije an àut com’a fùisso ‘n lampion
ò come un tabërnacol ant le procession ?
Trombëtte dla celebrità,
voi i seve bin mal ambocà.
Na dama ‘d società, ch’a lassa ch’im dësbreuja
a cheuje quaich piasì dë ‘dzora soa bigieuja,
na vòlta a l’ha passame ant un ambrass ardent
le soe cite babòje, sensa compliment.
Voi dime mach nen che, për conquisté la fama,
mi i l’hai da campé ai crin l’onor ëd cola madama
criand dë ‘dzora ij cop ëd tuta la sità :
“Madama la contëssa a l’é bele ampëstà.”
Trombëtte dla celebrità,
voi i seve bin mal ambocà.
Mi i l’hai n’amis tenor ch’a canta AVEMARIA
an cesa, cand ch’a-i é na cobia ch’as marìa,
ch’am lassa, con bel deuit, canté da porcacion
e mi i lasso che chiel a canta soe orassion.
Për voi mi i dovrìa fé na conferensa stampa
da deje ‘n dëspiasì ch’a-j dura fin ch’a campa,
cantand che mi i ‘l l’hai vist, a l’ITE MISSA EST
ant ël còro con na tòta sensa sotovest.
Trombëtte dla celebrità,
voi i seve bin mal ambocà.
Spiegheme, për piasì, con chi a venta ch’im cogia
për fé an manera che ‘l motor ëd la glòria as bogia :
na stèila d’Hollywood për cas a l’ha da vnì
ant ij mè brass al pòst ëd costa froja-sì ?
Për fé ‘d gatij a la gent a venta che mi ‘m pija
na quaiche prinsipëssa a tnime companìa
peui tuti patanù mostresse an sël pajon
an publich e magara a la television ?
Trombëtte dla celebrità,
voi i seve bin mal ambocà.
Le trombe a sonerìo moto pì fòrt soe nòte
se mi i butèissa nen ëd le braje, ma dle còte,
se mi i bogièissa ij fianch come le tòte e peui
mi i m’adatèissa al vissi ëd mòda al di d’ancheuj.
Ma ij mas-cc am piaso nen, nen për question ëd teorìa :
a l’é mach che a mi am dëspias pròpi ‘d delo via
përchè pensé mach nen che mi i sia tant fabiòch
da vorèj ëvnì famos, ma col darera a tòch.
Trombëtte dla celebrità,
Voi i seve bin mal ambocà.
Cost bel gir d’orisont ëd tute le arsëtte
ch’av dan a colp sicur l’onor ëd le gasëtte
a l’ha convinciume che, an fond mi i l’hai rason
ëd grateme l’amburì, cantand le mie canson.
Se av piaso mi iv jë canto sensa fé cagnara,
s’av piaso nen i jë buto torna ant la chitara,
la glòria am farà mai bogieme dal mè pòst
e ‘l làur am servirà mach per fé cheuse l’aròst.
Trombëtte dla celebrità, voi i seve bin mal ambocà.